Kabla hujatangaza kuuza gari lako wala hujapiga picha na kuweka tangazo la kuuza, kuna mambo ya msingi ambayo ni lazima kuyafanya ili kuhakikisha utakapoliuza basi unapata bei nzuri, unapata mteja haraka, na huku ukijitengenezea jina. Yafuatayo ni mambo muhimu ambayo kila anayetaka au kufikiria kuuza gari anapaswa kuyajua na kuyafanya:

1. Fanya Usafi wa Kutosha (Detailing)

Usafi wa nje na ndani ya gari ni kama CV ya gari lako. Hakikisha gari limeoshwa vizuri, tairi zimeng’aa, dashboard imesafishwa vizuri na kupakwa polishi, na harufu ya ndani ni nzuri na ya kuvutia wakati wote. Usafi wa gari huonyesha kuwa gari lilikuwa linahudumiwa na kutunzwa vizuri, hivyo humvutia mteja mara moja.

2. Kagua na Rekebisha Kasoro Ndogo Ndogo

Gari linapotoa mlio usio wa kawaida au taa ya check engine inawaka kwenye dashbodi, hii linaweza kumkimbiza mteja hata kama tatizo hilo ni dogo na vingine vyote vipo sawa. Kwahio rekebisha kasoro zote ndogondogo kama vile brakes, taa, fuse zilizoungua, na angalia kama AC inafanya kazi vizuri. Kuwekeza kidogo katika matengenezo kunaweza kukuongezea hela kubwa wakati wa kuuza.

3. Kagua Nyaraka Zote Muhimu (Documentation)

Kuwa na nyaraka zote halali za gari kama kadi yaa usajili (registration card), bima, kumbukumbu za huduma (service records), na risiti nyingine zozote muhimu. Pia, andaa barua ya uhamisho wa umiliki (transfer letter) ili pale mteja anapokuwa amenunua basi iwe rahisi kwa yeye kwenda kubadilisha umiliki. Mteja anapenda gari ambalo halina matatizo ya umiliki au faini za barabarani.

4. Tathmini Thamani ya Soko

Fanya utafiti wa bei za magari kama lako katika maeneo tofauti au mitandaoni kama Kupatana, garipesa.com,  Jiji, Makundi ya Facebook. Linganisha mileage, hali ya gari, mwaka, na uamuzi wa bei ili iweze kukusaidia kupanga bei kwa busara — si juu kupita kiasi, wala chini ambayo itakupa hasara.

5. Piga Picha Nzuri 

Picha nzuri ndiyo njia ya kwanza ya kumvutia mteja mitandaoni lakini pia unaweza kurekodi video fupi yenye kuonyesha gari huku ukielezea sifa zake. Piga picha za gari ukiwa sehemu yenye mwangaza mzuri, onyesha pande zote — mbele, nyuma, ndani, injini na dashboard. Hakikisha gari linaonekana safi, wazi hii itakusaidia kuwa na picha nzuri na zenye kuvutia wateja

6. Tayarisha Gari Kwa Kuonyesha (Viewing)

Andaa gari kwaajili ya mteja kuja kulikagua kama lina vipengele au laah. Wakati mwingine mteja anaweza kuja na fundi wake kwaajili ya kukagua lakini jitahidi sana wewe unayemuonyesha gari hilo mteja usiwe na watu wengi hili hupelekea mteja kukosa kujiamini. Hakikisha gari lina mafuta ya kutosha kusudi mteja anapotaka kujaribisha kuliendesha ili kuona ubora wake aweze kufanya hivyo, lakini pia hakikisha gari halina uchafu, na linapatikana kiurahisi pale mteja anapotaka kuja kulikagua. Pia, kuwa na muda wa kumuelezea mteja kwa ufasaha kuhusu historia ya gari.

7. Toa Sababu ya Kuuza

Wateja wengi huuliza kwa nini unauza gari. Kwa hiyo kuwa tayari na sababu ya ukweli – kama vile unahitaji kubadili gari, unahitaji pesa ya dharura, au unataka gari lenye matumizi madogo ya mafuta. Usitoe sababu za uongo – zinapunguza uaminifu. Lakini pia kuwa muwazi kumuelezea kama gari hilo lina kipengele flani hii husaidia kuongeza uaminifu

8. Tumia Maneno ya Kumshawishi Mteja

Sio kila kitu kuhusu gari lako vipo sawa, lakini unaweza kueleza vizuri faida zake na hasara zake. Kama ni gari la familia, eleza kuhusu nafasi yake, kama ni gari la vijana, eleza kuhusu performance na matumizi yake ya mafuta hii husaidia kumfanya mteja kujua kuwa anayeuza gari hili analifahamu vizuri. Tumia lugha inayoeleweka, yenye uhakika na ya kisasa.

9. Andaa Mkataba wa Mauzo (Sale Agreement)

Kabla ya kumkabidhi mteja gari baada ya kuafikiana nae bei, tengeneza mkataba wa mauzo kwa maandishi unaoeleza bei, tarehe ya makubaliano, aina ya gari, modeli yake, chasisi namba yake, namba ya usajili kama imeshasajiliwa,  jina la muuzaji na mnunuzi. Hii inalinda pande zote mbili dhidi ya matatizo ya baadaye

10. Uwazi na Ukweli

Uaminifu ni msingi wa biashara yoyote. Kama gari limewahi kupata ajali, sema. Kama kuna kitu hakifanyi kazi vizuri, sema pia. Hii inaondoa lawama baada ya mauzo na hujenga jina zuri.

Ukizingatia haya mambo kwa umakini, utaweza kuuza gari lako kwa haraka, kwa bei nzuri, na kwa heshima. Uuzaji wa gari si tu biashara – ni sehemu ya kujenga uaminifu wako katika soko na kwa watu.